O II Encontro Internacional Viaxeiros: transitando pola Idade Media desenvolverase durante os días 5, 6 e 7 de xuño de 2017 en Santiago de Compostela. O evento, que se promove desde a Rede de Estudos Medievais Interdisciplinares, dá continuación á andaina emprendida en 2015, coa celebración de Viaxeiros: do Antigo ao Novo mundo. Esta segunda edición contará coa intervención de investigadores xa consagrados e recoñecidos a nivel internacional, así como coa participación de investigadores nóveles e en formación, coa pretensión de ser un punto de encontro onde se propicie a exploración e un mellor coñecementodo mundo medieval.

As viaxes, nas súas múltiples dimensións, constitúen o principal fío condutor do encontro. De tal maneira, teremos noticia de cabaleiros errantes, de peregrinas, de xograres, de cruzados e doutros personaxes itinerantes do medievo. A través das súas aventuras, teremos ocasión de percorrer espazos reais e históricos, sinalados na cartografía, así como de transformarnos no transcurso dunha viaxe imaxinaria por un espazo mítico, literario ou metafórico. Un transitar pola Idade Media que, cunha mirada ampla e interdisciplinar, dará pé a achegarse á circulación de ideas e xentes, á divulgación de textos e obxectos, á expansión de tendencias culturais,  artísticas e intelectuais.